黃紫盈喊

上月27日傍晚近六點嗰陣，無綫互動新聞台主播黃紫盈，於報道曼德拉近況時，提到曼德拉未有好轉，現任總統祖馬留喺國內，取消出訪鄰國莫桑比克。講到呢度，黃紫盈抿一抿唇，兩眼更紅，眼淚終於忍唔住跌咗落嚟，聲線亦變得顫抖…

 
唔少網民都關心紫盈，有人話佢因為曼德拉病情而哭，但都有人就話，紫盈報道曼德拉病情前，兩眼已經紅晒，可能係之前發生咗啲事，令紫盈報道新聞時，已經熱淚盈眶。亦有人估計，紫盈係咪俾老闆鬧呢？

講開紫盈，今年25歲，做天氣女郎嗰陣已經好搶眼，加上五官標緻，好快成為宅男女神，佢嘅相仲喺討論區上瘋傳添。紫盈來頭亦都唔細，中大新聞系畢業，又到過日本留學，所以當時佢都盡力保持專業，點都講埋篇新聞先。

唔知紫盈心情o依家平伏番未呢？